Gjiza hyn në grupin e djathrave të buta. Ka shumë mënyra për të bërë gjizë ashtu siç ka edhe shumë lloje gjize.Këtu ku jetoj unë,(Kretë), llojet që gjen në Market janë:
- Anthotyros
- Ricotta
- Cottage Cheese
- Mizithra etcc..
me diferenca të theksuara në lagështi, në thartësi, në sasinë e kripës që kanë dhe në jetëgjatësinë e produktit.
Dikush mund të thotë:
Përse të lodhem të bëj gjizë kur ka Pazari plot për të gjitha gustot dhe për të gjitha xhepat??
Përgjigjja ime është e thjeshtë.
- Sepse ia vlen!! Ne blejmë zakonisht Mizithra (6 euro për 1 kg) e cila është e ëmbël, me shumë lagështirë dhe me jetë të shkurtër.Duhet konsumuar mbrënda 3 ditëve sepse pastaj fillon edhe thartohet. Plus, nëse do që ta përdorësh për byrek ose për ëmbëlsira, duhet ta kullosh patjetër. E thënë ndryshe, është dhe e shtrenjtë, ka edhe punë!
Gjiza që bën vetë, vërtet ka punë, por është e shijshme, është ekonomike dhe kryesorja -Nuk ka substanca te dyshimta!
Gjizën e mirë, pa hile, nëse e gjen në Market, do e paguash sa frëngu pulën.
RECETA për Gjizë Shtëpie
Përbërësit :
- 1 kg kos natyral i kulluar (10% yndyrë)
- 1.5 kg qumësht (3.7% yndyrë)
- 1/3 lugë kafeje Limontoz
- 1/2 lugë kafeje kripë (nëse duam)
- 1 gotë ujë të ftohtë
Për Përbërësit
Kosi - duhet të jetë natyral, i bërë vetë ose i blerë s'ka rëndësi. Po qe i kulluar, më mirë akoma. Nuk duhet të ketë substanca të tjera si sheqer, niseshte apo fruta.
Më saktë : JO Yogurt Dessert!
Qumështi - duhet të jetë i paskremuar sepse duhet ta pranojmë : Yndyra i jep shije!
Limontozi - njihet si Citric Acid (ξινό).Është një konservant natyral dhe nxirret nga agrumet (limona,nerënxa etc..)
Nëse nuk ke limontoz, mund ta zëvendësosh me gjysëm gote lëng limoni. Mua nuk më është dashur ta provoj sepse Limontozin e gjej lehtë në supermarket dhe është i lirë
(50 gr. = 1euro).
Kripa - Unë nuk i hedh kripë se dua hirra të dalë e ëmbël.
Mjetet që duhen:
- 1 tenxhere që të mbajë rreth 4 litra
- 2 kupa të mëdha
- 1 kullonjëse
- garzë për të kulluar
- 1 garuzhde
PREGATITJA
1--Hedhim qumështin në tenxhere.
2--Vëmë tenxheren në zjarr.
3--Sapo fillon të vlojë qumështi, hedhim kosin dhe e përziejmë mirë.
4--Pas 5 minutash hedhim limontozin (dhe kripën nëse duam) dhe përziejmë.
5--Prapë, pas 5 minutash hedhim 1 gotë ujë të ftohtë dhe përziejmë.
6--Pas 10 ose 15 minutash e heqim nga zjarri dhe e lëmë të rrijë.
7--Pas gjysëm ore, pasi është ftohur pak, fillojmë të ndajmë gjizën nga hirra.
Ky proçes është shumë i thjeshtë, mjafton të organizohesh.Në banakun e punës :
--Majtas, vëmë tenxheren
--Në Mes, një kupë mbi të cilën është kullonjësja dhe mbi të cilën kemi shtruar garzën.
--Djathtas, vëmë një kupë ku do hedhim gjizën e kulluar.
8-- Me garuzhde, marrim lëng nga tenxherja dhe e hedhim mbi kullonjësje. Maza e bardhë = gjiza do qëndrojë mbi garzë kurse
lëngu = hirra do kullojë mbrënda në kupë.
9-- Kur mbushet garza me gjizë, e shtrydhim fort sepse duam që gjiza të ketë sa më pak lagështi.
10-- Gjizën e kulluar e kalojmë në kupën djathtas (do dali si një topth i bardhë.
Ruajtja dhe Përdorimi
Gjizën, nëse duam ta ruajmë për një kohë të gjatë, e vëmë në qeska dhe e vëmë në ngrirje.
Nëse do e përdorim mbrënda javës, e vë gjizën në vazo qelqi, e shtyp dhe e sheshoj mirë, hedh përsipër kripë dhe e mbuloj me vaj ulliri.
Hirrën, pasi ftohet, e hedh në shishe dhe e ruaj në frigorifer. Hirrën zakonisht e bëjmë shëllirë por hirrën e freskët mund ta pimë si lëng sepse ka plot proteina.
Kaq.
Nëse ju pëlqeu ky postim, lini një mesazh.
Do ta vlerësoj!
Faleminderit e Mirupafshim në Postimin tjetër!!
No comments:
Post a Comment